Profil

Msye Meggy Sodie Marie, aze 41 an in ne e grandi Anse aux Pins. I sorti dan en fanmiy kat zanfan, i annan trwa frer e li trwazyenm zanfan. Son paran, Madanm Cecile Marie (koni koman Yvette) i en manm veteran e son papa ti mor dezan pase, Andrea Marie. Par profesyon son papa ti en mason.
Son trwa frer; Leslie Marie ki travay SBC, Pascal Marie (self-employed) e Francis Marie ki en Teknisyen Laboratwar. Tou son fanmiy i siport Parti antouka son paran ti bann militan SPUP.
Msye Marie, en Katolik, in lekol Anse aux Pins depi Lakres ziska P9 apre sa in fer 2an NYS e 2an Politeknik. Swivan sa in fer 3an ‘teachers training’ e al 6 mwan Zapon pour en kors dan ‘Automotive Mechanic’. I annan en Degre dan Ledikasyon ki son pli o kalifikasyon e depi 1994 ziska la i pe travay koman en ansenyan SIT.

Son pase ek Parti

Depi dan laklas 3yenm (primer) i ti zwenn ‘Young Pioneers’ e dan klas 6yenm i ti form parti ‘Brass Band Young Pioneers’. Apre sa in zwenn Lig Lazenes SPPF (Youth League) e osi form parti Brass Band Youth League. Answit in vin Tyermenn Lazenes Anse aux Pins e son lentere dan lanmizik ti fer li form en benn ki ti apel ‘Kiosk’, e zot ti kontan zwe dan bann rali. I’n Tyermenn Lazenes ziska ler Joseph Francois ti vin MNA savedir 7an pase i ti sorti Tyermenn.
Lo nivo nasyonal i ti ansarz Latroup Nasyonal Lazenes Sesel. E dan distrik depi in sorti Tyermenn Lazenes i responsab zon ‘Berlen’ ziska la.
I donn tou son letan dan kanpanny. I partisip dan travay volonter. I en manm PTA (Parents Teachers Association). Msye Marie i en dimoun ki tre popiler Anse aux Pins parmi lazenes e veteran, e toultan aktiv. Kan i pa pe fer travay Parti oswa zwe lanmizik, i kontan reste se li.
Lo kote lanmizik i ‘multi-skilled’ i kapab zwe tou lenstriman enkli mandolin e i ti aprann zwe lanmizik avek en veteran Parti.
I pe reste Green Estate depi 2an. I pankor marye me pe reste ek son partner e zot annan en pti garson 6an.