En kandida ki pou defann Anse aux Pins

Meggie Marie in komans montre zabitan Anse aux Pins ki son disan demantibilizater i la. Set en garson ki’n ne dan en fanmiy SPUP e in grandi pour war son paran e bokou veteran ki i frekante fer politik, alor in konn defann son lekor kan SNP Gervais Henrie ti krwar in vin tou pour met li dan en kwen. Son premye zour, deza zot in oule atak li. Msye Marie i konnen ki son latas se fer sir ki bastyon SPUP i ganny proteze e prezerve.

I annan sipor son manman, en madanm ki dir ki sa Parti in dan zot lavenn depi komansman, e tou zabitan in konn Meggy koman en dimoun ki’n debrouye dan Parti, dan Anse aux Pins pour donn koudmen kit sa laflanm alimen. I popiler ek veteran akoz i en zonm ki kontan ekoute, i obeisan e poli. I frekant bokou zenn akoz i aktiv, kontan partisipe, sirtou lanmizik se son domenn prefere, in en ansennyan pour 18 an e bokou etidyan in pas dan son lanmen, e i en gran farser. Wi, dan politik Parti Lepep nou bezwen bann zanfan nou Parti ki’n ne dan sa Parti e ki’n grandi pour defann e kontribye dan sa Parti. Parti Lepep i bezwen pa zis en bon kozer me enn ki annan limour, e konn fer fars. Ou konnen sa kalite, mon pou dir ou, sirtou ek sa bann kalite zans ki nou annan lopozisyon ki visye e kontan gognard lezot.
Meggy Marie set en Katolik, ki’n konplet son ledikasyon de baz Anse aux Pins. I’n al NYS e Politeknik.  I’n plitar fer son letid pour vin en ansennyan e i posed en Degre dan Lansennyman. Son spesyalizasyon i dan ‘Automotive Mechanic’ e zis parey i kapab demonte e remont en transpor, i osi konnen ki defi ki Anse aux Pins pe fer fas avek, e ki solisyon pour problenm dimoun. I’n pas tou son lavi adilt pe ekout dimoun. I’n toultan figir lo lalis pour vin MNA me la in arive. Gouvernay i dan son lanmen in pare pour aranze e fer bouze Anse aux Pins.
I’n target plizyer domenn, par egzanp i enn sa zabitan ki war L’Ile Soleil in tro la, in vin landrwa pour pye sed ek zwazo. Meggy Marie i oule war zenn antreprener Anse aux Pins ganny menm sans parey bann ki’n etabli lo serten landrwa konble tel ki Providans, Ile Eve Praslin e Perseverans ki pe bouze. I konnen ki en kantite dimoun, enkli zabitan Pointe Larue pe frekant Klinik me ki sa klinik pa neseserman enn nef. I’n ler pour donn li en lot limaz oswa donn sa landrwa en klinik ki azour ek lavi dan Sesel. I pe ‘look forward’ pour war Legliz konplete  e in fer remarke ki Pret Laparwas pe fer en bon travay pour donn distrik pa en Legliz me en ‘Bazilik’. Parey nou’n dir set en dimoun farser me ki lekspektasyon i o dan son travay. I oule ki Ladministrasyon Distrik i donn koudmen delivre pour fer zabitan apresye ki tou lotorite distrik i annan zot aker.
Malgre la tou dimoun i oule vin koz pour Anse aux Pins se selman Meggy Marie ki’n santi e viv soufrans e moman lazwa sa distrik ek son zabitan. Menm bann pti group lopozisyon dan sa distrik i konn Meggy e zot annan respe pour li. Meggy pou tenir bastyon nou Parti e in pran larelev pour ARANZE E FER BOUZE ANSE AUX  PINS.