Bondye in kree ou pour zetwal

Sa ti enn bann reaksyon madanm Cecile Marie koni koman Yvette manman nouvo kandida Anse aux Pins, Meggy Marie. I dir ki toultan son garson in en non ki’n monte dan bi pour vin MNA e wi lasans dan lepase pa ti pour li me la in ariv son tour. “Sa ki pour ou pou toultan pour ou. Sanmenm sa ki nou dir Bondye in kree ou pour zetwal”, Madanm Marie ti dir ‘The People’.

Set en madanm byen zantiy, en madanm ki posed sa kalite ki wi nou dir limenm ki’n fer grandi sa bon garson ki ozordi pe debout dan eleksyon pour koz lo non zabitan Anse aux Pins. “Meggy ek son bann frer, zot in grandi byen e touzour reste lwayal ek Parti. Zanmen mon’n ganny okenn problenm ek Meggy. I’n toultan obeisan e menm si pa mwan i toultan pe koz avek vye dimoun. I kontan ekoute e pran konsey. I pa en dimoun ki pran lakoler e set en garson ki entelizan e kontan travay”, madanm Marie ti dir.
Sa madanm ki ti grandi Anse Boileau ti marye e vin Anse aux Pins kot in etabli pour 45 an ek son defen msye Andrea Marie. Malere, papa Meggy pa pou la pour temwanny e konsey son garson dan sa parkour ki menm si pa nouvo, me kanmenm en defi pour nenport ki imen. Msye Andrea Marie li osi ti en veteran SPUP, en militan ki’n ne pour viv lalit ki fondater SPUP Msye France Albert Rene ti komanse Anse aux Pins. Sa lalit pe kontinyen atraver dirizan James Michel e garson defen Andrea in ganny loner pour donn en koudmen. Ler nou kalkile, pa sipoze annan lapliferans me dan plan devlopman gouvernman, Anse aux Pins ti merit ganny serten pti privilez. Anse aux Pins i reprezant komansman, kot larout ti trase, o nivo distrik pour ki SPUP in viv ki ozordi Parti Lepep in reisi la. En kantite dimoun merit dir mersi sa Parti pour zot lavi ki zot pe viv. I annan ki pa vir deryer pour get son pase e apresye. I annan ki onte i ti mizer akoz in tro ris, alor zot pa kapab siport Parti Lepep. Me la zot annan pour get Meggy. Get li koman sa dimoun ki reprezant zot pase, e zot lavenir. Se li zot eritye e ki pou garanti zot legzistans. 

http://www.facebook.com/pages/Sir-Meggy-Sodie-Marie/403228043058568?ref=stream
Please like Sir meggy page